要靚唔要錢…

 

唔知係咪人老左, 皮膚已經大不如前啦!  唉…  真係唔認係中女都唔得!!! 

同一兩年前比較, 以前一支護膚同一支洗面就可以行走江湖; 但依家, 搽少一樣都唔掂呀!

最近, 見開始轉季再加上 SOGO 有什麼什麼promotion (haha, 簡直係一個好好既藉口), 我一口氣買左千幾蚊既護膚品喔!

 

首先出場有 Kose (出名超正美白系列):

1th set: 雪肌精爽膚水 (送Q版乳液 + Clear Lotion + 面膜一張)

2nd set: 雪肌精乳液 (送Q版晚霜 etc) + 超多 samples 仔

 

      

   *  個 sales 姐姐超好人, 最後仲再送我幾包豆腐面膜, 兩小瓶卸妝 cream, 同埋一支Q版 cleansing cream

 

跟住就有 Shiseido:

1th set:  UV base + Maquillage 乾粉 (送支洗面膏, Softener, 晚霜, 同埋一支 mask仔) + 超多 samples

 

      

   *  就係依套戰利品啦~! 

 

      

  *  超靚既粉盒… 右下角仲有一粒閃閃石, 好鍾意呀!

 

      

 

      

*  幾經 “努力”, 先至叫到個化妝姐姐送多D samples 俾我呀! 

 

依幾年天氣變到咁, 紫外線簡直超晒標, 如果唔搽除防曬就出街, 我諗我既皮膚好快會變成又乾又黃又有斑啦…   為左減慢我既皮膚變差同衰老, <<<<美白>>>>真係好緊要架!   話晒真係 ”一白遮三醜” 嘛!

雖然俾錢既時候真係有D肉尺, 但為左靚, 今次真係唔理得咁多…

黎緊既夏天, 就靠晒佢地啦!

 

 

 

薑汁撞奶 - 超容易整喔!

好開心呀! 又一成功之作 – <薑汁撞奶>!

從前在娘家時, 媽咪間唔中都會整薑汁撞奶俾我地食…   因為佢話又容易整, 又健康! 但係, 我就無問佢點樣整, 因為如果以前一想食, 只要同媽咪講, 佢就會整係我食啦! 

前幾日返娘家, 終於忍唔住叫媽咪表演一下啦!

嘩, 原來材料簡單之餘, 整完食埋都唔駛半個鐘咋! 真係快靚正…

其實整依個薑汁撞奶, 最重要係留意當中既 “技巧”!



步驟 (以兩小碗份量計):

1/ 預備好較乾身既薑

2/ 一定要用 <維記> 鮮奶 (因為只有用水牛奶先至可以撞得到架!)

3/ 磨薑汁至少要用五蚊 size 咁 (在碗中); 如果鍾意薑味濃, 當然可能用多D薑汁啦!

4/ 用中小火煲盒 <維記> 鮮奶 (同時間放一茶匙糖). 依一 part 係超重要! 係要好留意個火...   當一見到煲到奶既圍邊出現好多既泡泡仔, 就要熄火啦!

5/  跟住動作唔可以停咁拿住個煲同埋個量杯

6/ 互相好似拉絲襪奶茶咁互拉, 第七下就倒入個碗度

7/ 等五至八分鐘, 成功左! 食得啦!



今次係我第一次整咋! 真係超開心成功整到! 真係要多謝媽咪傳授左個咁正既 “秘訣” 俾我!

P.S.  薑汁撞奶有溫補同驅風既功效.  平日鍾意飲凍野或生冷野既人, 應該多食薑汁撞奶, 因為可以調整過寒的體質 & 有驅寒暖胃之功效.  而且仲有養顏同治胃痛的功效架!





     

   * 材料簡單到只要有: 維記鮮奶, 薑, 磨薑器 & 量杯就 OK 啦!

(又去) 台北新春喪買喪食唔夠喉之旅 - Day 4

Day 4: 台北101, 誠品旗艦店, 五分埔, 饒河街觀光夜市



快樂既時光真係過得特別快, 話咁快又到第四日啦…

依日訓夠皮之後, 分兩架的士去左 New York New York 門口集合, 目的係去飲中茶…

之後去左六樓既  <紅磡港式茶樓> 飲茶…  估唔到佢地既點心都好ok喎!

食飽野就周圍行下, 我同亨利 @ 誠品仲買左D書添...

到左下晝, 係時候要坐地鐵去依日最精彩既節目, 狂買 @ 五分埔啦!!!!!

嘩, 因為剛巧又係台灣人既新年, 所以五分埔超多人… 不過我地都無被影響, 見平見靚就買呀! 掃呀!!

大家分組行街掃貨, 兩個半鐘頭後就響 <松山車站> 集合, 依個安排簡直係 perfect! (因為松山車站又有lockers 租用, 方便我地放好野之後再係饒河食食食…)

其實兩個半鐘頭響五分埔, 真係唔夠我用架! 不過, 為免老人家久等, 我同亨利都行到過晒時, 仲跑到傻去車站同佢地會合…  hahaha, 原來佢地都已經到左, 仲霸左個大locker 等我同亨利黎呀!

好開心見到大家都買左好多野, 但就超攰….  跟住我地就接力去饒河醫肚啦!



      

  *  有個傻佬係我後面 say HI 呀! hahaa...

(又去) 台北新春喪買喪食唔夠喉之旅 - Day 3

Day 3: 北投浸溫泉, 淡水老街



第三日, 又係落雨天…

我地依朝去左台北車站上面既 <微風車站> 食 brunch…

跟住就出發去新北投浸溫泉啦…

雖然大家都係第一次去新北投, 但出左捷運既指示牌同埋手上既地圖都好清楚, 所以都知道行去邊個方向…

首先, 我地去參觀左 <溫泉博物館>…



     

(又去)台北新春喪買喪食唔夠喉之旅 - Day 2

Day 2: 鼎泰豐, 中正紀念堂, 九份, 基隆



朝早十點半六人由酒店出發, 分兩架的士去 <鼎泰豐> 總店食 brunch!

一個字, “正”!  簡直係原汁原味, 又唔洗好似香港咁等幾個鐘先有得食! (食完之後媽咪仲叫 Day 3 又黎食呀! 可想而之係幾好味呢!)

食飽之後, 我地就行去 <中正紀念堂>, 影番 一兩張相, 到此一遊吧!

依日既重點, 就係去 <九份> 同埋大家都未去過既 <基隆>…

雖然又係落住長命雨, 但都無影響我地既心情…

首先, 媽咪買左三個好好味既花生卷連雪糕; 雖然依個配搭好似有D怪, 但原來食落去真係好香口同好好味架! (下次如果再去一定會再食)

跟住我地就去左 <九份老麵店> 試下個牛肉麵, well, 唔差喎! 而且碟青瓜仔都好好味架!

食飽無耐, 我地就搵左間有幾層高既 “Cafe” hea 下, 名為 <觀海山>! 真係估唔到坐得舒服之餘, 野飲又好飲, 望出去既環境仲一流呀!

最後, 我地攰攰地坐大巴去基隆繼續 happy 啦…



      

(又去) 台北新春喪買喪食唔夠喉之旅 - Day 1

Day 1: 忠孝敦化, 士林夜市





真係估唔到一年去左三次台灣…  雖然又去, 但一D都唔厭, 仲好開心添!

唯一唔好既, 就係頭三日都落雨呀!!!

不過我地都唔理咁多, 照跟我地一早計劃左既行程 GO 啦…

今次出發幾個月前已經出左機票, 坐泰航來回都只係 HK$1,100 一個人, 真係抵到爛呀! 

貴都係貴在酒店, 因為撞正新年, 好多酒店又 full 又貴左; 不過都無計啦, HK$650一晚都值得, 因為又係我同亨利都好鍾意既 <新驛旅店 – 後站店> 啦!!!

除左勁近台北車站外, 仲有發現一個超靚既新商場開左係隔離 (似 Sogo 果隻, 又有好大既 food court, 正), 名為 <京站時尚廣場>!

同細佬 & Elaine @ CityInn 會合後 (因為佢地早我地一日飛去台北), 第一站就係去醫肚 @ 忠孝敦化…

食左少少野同叉左一陣電之後, 我地一行六人就坐捷運去劍潭站 – 士林夜市 (雨中) 行街同食野啦…





     

好味又簡單既 &lt;南瓜蒸排骨

雖然每日放左工之後都好攰, 但諗起煮完餐飯可以同亨利開開心心咁食, 辛苦D都唔緊要呀!

要準備一餐飯既功夫其實都唔少, 起碼要先洗, 要浸, 要切, 要醃, 跟住煮, 但為左我同亨利既健康, 屋企煮總好過出街食味精野!

最近無意間發現有一樣好味又簡單既餸, 就係 <南瓜蒸排骨> 啦!

廿蚊排骨, 洗淨再用基本野醃好 (跟住再加麵鼓又或者用豆鼓醬都得…) 加埋切好既南瓜片一齊蒸 25 分鐘, 咁就食得啦!!!

蒸緊既同時, 再抄番碟靚菜… 就可以開飯啦!


      

   *  買廿蚊腩排唔要太肥... 洗好就可以醃架啦! 醃大約半個鐘之後, 就再加少少蒜蓉豆豉醬...