2009年9月30日 星期三

有BB啦~~~

 


HAHAHAAA....  唔好嚇親, 我係指7仔既 Kewpie BB 咋...


同亨利經過一輪瘋狂喪買雪糕雪條之後, 再加上家人既相助, 我地終於儲到好多個7仔印花去換 Kewpie BB 呀!!!


今次換既公仔真係幾得意呀! 細細隻, 個樣又Q Q地...  不過相信我唔會換晒全套啦, 因為食得太多雪糕會肚痛架... hahaa...


 


         


 


         


 


 


第一個出場既係 <魚蛋BB>:       


         


        


 


第二個係 <燒賣> BB:


        


 


最後既係 <奶茶BB>:


        


 


 


 


2009年9月26日 星期六

ELLE X agnes b 靚靚化妝袋

 


真係要好多謝其中一個既 blogger 既分享, 俾我無意間知道依個開心大發現! Hahaa…


今期十月號既 ELLE, 連書奉送一個好靚既 agnes b 細細化妝袋呀!!!


星期五同同事食完飯, 即刻去掃7仔同 Circle K


不過好可惜, 癲到行左十幾間, 全部都俾人買晒啦


靈機一觸, 即刻打電話俾細佬睇下佢果區既7仔有無嘩嘩嘩, last 一本俾我細佬買埋啦, YEAH!!!  <唔該晒你呀!!! >


HK$40 一本 ELLE 送埋個咁靚既袋, 真係抵到爛呀! 雖然係送, 但質地同真既 agnes b 化妝係一樣架! 無偷工減料架! 


YEAH, 今次真係好開心呀!


 


 


       


   * 為左"你", 大熱天時我行左幾條街加十幾間舖搵"你"...


 


       


   * Hohoho, 見你咁靚, 搵得咁辛苦都係值得既...


 


       


   * 依次既 Crossover 真係好成功呀! 好野!!!


 


 


 


2009年9月25日 星期五

札幌日本拉麵屋 @ 奧海城

 


前幾日放工無煮飯, 同亨利走左去奧海城行下街同食野...


見到有間食肆有兩隻好大既字 <札幌> , 我同亨利都即刻諗起北海道 honeymoon 既時候~~


望一望, 原來係拉麵專門店! Well, 為左想回憶一下札幌拉麵果種味噌既香味同感覺, 最後我同亨利都走左去試下...


我地一人叫左一個套餐: 套餐除左有一碗麵之外, 仲會包一個小食, 可揀鰻魚飯 / 豚肉飯 / 餃子 / 雞肉串等...


 


 


       


 


個所為小食其實都唔細份... 碗飯都有成大半碗, 鰻魚同豚肉都好好味...


至於拉麵, 我同亨利都係揀左最簡單既叉燒拉麵... 


Um... 不過, 個湯底味道唔濃, 好彩都有好多叉燒搭救; 總括黎講同北海道食果D仲係差好遠.....................


但店舖環境都幾舒服既... 如果對拉麵要求唔太高既話, 依樹都可以一試架~!


 


 


 


2009年9月19日 星期六

假日的午餐



依幾日天氣熱到差D中暑, 所以出街多數等到好晏先至行動, 費事熱壞人...

雖然屋企樓下有好多食肆, 但今日我都寧願留係屋企整野食...

而今日既我同亨利既 Sunday Brunch 就係:

香煎薯餅 + 粒粒豆腐粟米湯



    


 * 先有免治牛肉...  (用基本野醃二十分鐘)





    
 

  *   小薯仔六個 (二人份量)





        


  *   (上下) 將洋蔥切成粒粒狀

   






    


   *  跟住煲淋薯仔後再壓成蓉...



        


   *   再將醃好既牛肉同洋蔥加入薯蓉內搞好





  


    *   用小小保鮮紙包起適當份量, 然後壓平...  跟住就可以用中細火煎架啦! 





        


   *  Yeah, 食得啦... 勁香又有益!!!  亨利都讚好味呀!!!





        


   *  仲有整埋超滑豆腐粒粒粟米湯...



        


   *  食完真係好滿足喔...







2009年9月12日 星期六

Mrs. Fields 朱古力月餅

 


最近大新信用卡做緊優惠, 只要碌累積滿一千蚊, 而每次最少係三百蚊以上, 連埋月結單寄黎既 coupon 去 Mrs. Fields, 就可以免費換一個朱古力月餅啦...


咁岩我夠一千蚊, 尋日就去左換一個試下...


有雙重朱古力, 白朱古力, 同埋合桃朱古力三款俾你揀; 而我就要左合桃朱古力啦!


真係估唔到免費既, 個 size 都同真既月餅一樣; 而且包裝又靚, 個盒仲可以另有用途架!


 


 


        


       


    *  個硬盒真係好靚架!  之後可以用黎裝錶又或者飾物...


 


        


  *   原來個盒蓋既設計, 係可以做相架呀!!!!!! Mrs. Fields 真係好計仔! 


 


        


 


       


 * Wow, 同屋企人分享, 個個都覺得幾好味!  裡面似係曲奇蛋糕仔既口感同味道...  最難得係唔太甜, 岩岩好...  Um, 依種月餅用黎送禮不失為一個好選擇喔!!!


 


 


 


2009年9月8日 星期二

工作

 


唔經唔覺, 依份新工都就黎做左一年...  相信唔可以再叫做


可能因為以前份工太過辛苦, 太大壓力; 到依家, 間唔中都會諗起以前果種拼博同挑戰, 其實都真係幾難忘


人大左原來真係會變, 有時仲會變得無乜理由…  又或者可以話, 人人會向上爬 向前看, 但我竟然原地踏步, 甚至退緊步


究竟 ~ 我依家係咪真係甘心去做一個公司既 small potato ? 仲要每日重覆去做同樣既事, 同埋做我認為最簡單既工作呢??!! 同享受懶惰&悠閒到爆既 Admin 生活呢???


定係應該返轉頭去重新拼博, 去做番好似以前一腳踢 “Marketing” 既我? 又可以成日有藉口去扮得靚靚, 又有好大既見識, 令你個腦轉得好快, 壓力令你又有好好既耐力呢…???


又或者, 其實我依家既嘆係 身在福中不知福”???


結左婚既女人, 係咪唔應該選擇做 女強人???


 


 


以下係我 @2003-2008年工作既 "戰績", hahaa....


 


       


  *  真係好難得可以@兩個唔同既 functions 同 Richard 李澤楷影相留念...


      


 


       


  *  單仲楷議員 & 我 @公司 Annual Dinner


 


       


  *  我與林秉恩醫生 @公司 Annual Dinner


 


       


 *  孫耀威 & 我 @公司 function (Eric 份人完全無架子, nice到爆...  我仲陪佢等出場, 同佢 & 佢助手傾左好耐計, 真係好開心呀!!!)


 


       


  *  古巨基係某年我公司其中一個 project 既大使, 而我就代表一間贊助商上台取紀念狀, hehee... (古 sir 好好人, 仲幫我簽左張有我同佢既名既海報呀!!!)


      


   *  你睇我幾開心... hehee... (不過其實背後係好辛苦架!) 


 


      


  *  依張相已經係2004年影架啦...  而城城係我地公司一個大 project 既大使... 而城城前一晚仲通宵拍戲無訓過架!


 


 


2009年9月5日 星期六

媽咪生日 @ 金羅寶 (銅鑼灣金百利)

 


雖然下星期二先係媽咪既生日, 但我地就預早左前晚慶祝


本來提議食 buffet, 常悅素食, 又或者韓燒; 最後媽咪揀左去金羅寶食韓國野!


依度係我第三次黎食, menu 同野食雖然都無乜改變, 但佢地 (全是正宗韓國人) 既 service 就真係好值得欣賞 (keep 得好好)…


我地叫左石頭煱飯, 高麗人參雞湯, 牛肋骨湯, 烤豬肉拼盤, 同埋烤牛肉拼盤, 仲有好多送既配菜


食飯之前, 我叫亨利靜靜雞去美心或者東海堂買定一個小蛋糕, 可以食完韓燒之後點蠟燭唱生日歌俾媽咪開心下...


最後, 亨利竟然買左一個 @美心既 Kitty Lab 啫喱杯代替蛋糕仔! Hahaa… 都好, 因為我可以要番隻靚靚膠杯喔!


最後, 金羅寶仲有送雲呢拿雪糕同埋生果橙做甜品; woo, 真係好飽呀!


 


     


      


     


   


 *  一落完 order 就送上咁多免費配菜, 正呀!                        


 


     


  *  第一樣黎既 - 石頭煱飯, 好好味!


 


     


  *  第二樣黎既 - 牛肋骨湯 (剛好分到六碗) Well, 不過不失, D牛好淋, 唔太差喎!


 


      

 * 依碗仔係我既!


 


     


  *  跟住再飲 - 高麗人參雞湯... 依個濃味D, D雞肉好滑, 好味呀!


 


      


  *  韓燒既 - 烤豬肉拼盤 (HK$230) 都幾貴呀!!!


 


     


  *  仲有韓燒 - 烤牛肉拼盤 (HK$260) 好貴呀...


 


       

 


  *  扮住蛋糕同媽咪慶祝既 Hello Kitty Jelly! (唔通亨利記錯左以為我生日, 所以買左吉蒂貓??!! hehee.... )


 


      


  *  HAPPY BIRTHDAY TO MY DEAREST MOMMY!!! 


 


 


 


2009年9月2日 星期三

第一次整豆腐布丁



好開心呀! 貪得意第一次整個 <豆腐布丁>, 成功左又好好味呀!!!

參考左網上一 D bloggers 既方法, 我去買齊材料就試下整啦...

只要有百福甜豆漿 (買甜既就唔洗加糖煮啦), 一盒屋仔奶, 淡忌廉, 同魚膠粉就搞掂, so easy!